ಪಾಠ

ಗೆಳೆಯಾ,
ಆತುರವು ಬೇಡ !
ಮೋಹಮಾಯೆಗಳ ಸಂಕೀರ್ಣ ಸೆಳಹಿನಲಿ
ಬದುಕನರಸುವ ಗೊಂದಲದ ಮೀನು
ನೀನಾಗಬೇಡ.

ಜೋಡಿ ಜೀವನದಲ್ಲಿ
ಗೆಳೆತನದ ಬಂಧವಿದೆ
ಎಳೆತನದ ಅಂದವಿದೆ
ಅಪ್ಪಿ ಮುದ್ದಾಡುವ ಸಂಬಂಧವಿದೆ !
ಗೆಳೆಯಾ,
ಆತುರವು ಬೇಡ

ಹಗುರಾಗಿ ಎಣಿಸದಿರು
ಬೆರಗಾಗಿ ನೋಡದಿರು
ಇದ್ದುದನಿದ್ದಂತೆ ಗಣಿಸುತಿರು
ತಾಳಿದರೆ ಕಾಣುವುದು ರಹದಾರಿ
ನೀನಂದು ಪೂರ್ಣ ಸಂಸಾರಿ !.

ಬಗೆಬಗೆಯ ಬಣ್ಣಗಳಲ್ಲಿದೆಯೇನು ಅಂದ ?
ನಾನಂತೂ ಕಾಣೆ;
ಕಣ್ಣೊಳಗಿನ ಪಾಪೆಯೂ ಕಪ್ಪು
ನೇಸರನಂತರಂಗವೂ ಕಡುಕಪ್ಪು,
ತಿಂಗಳನ ಮಚ್ಚೆಯೂ ಕಪ್ಪು.
ಕಪ್ಪನ್ನು ಕಪ್ಪೆಂದೆಣಿಸುವುದೇ ತಪ್ಪು !.

ನಿನ್ನಾಯ್ಕೆಯಾ ಮೇಲೆ ನಂಬಿಕೆಯು ಇರಲಿ
ಅವಳಾಯ್ಕೆಯೂ ನೀನೆಂಬ ಹೆಮ್ಮೆಯೂ ಇರಲಿ
!.


[ನನಗೆ ಕವಿತೆ ಬರೆಯಲು ಬರಲ್ಲ.  ಅದರ ನಾಜೂಕು ಗೊತ್ತಿಲ್ಲ. ಸುಮ್ಮನೆ ಇಲ್ಲಿ ಬರೆದಿದ್ದೇನೆ. ನಿಮಗಿಷ್ಟವಾದರೆ ಅದೇ ಸಂತೋಷ :) ]